Аныгы дьахталлар мэтириэттэрэ.

(Пародия)

1. Дьыалабыай дьахтар.

Хоҥор хаастыы
Хоноччу туттубут,
Хотун-хаан көрүҥнээх,
Сааһын тухары
Салайар үлэҕэ
Үлэлээбит кэриҥнээх.
Ас-таҥас иҥмит,
Арыы-сыа ньалҕарыйбыт
Өҥ-тот көстүүлээх,
Өҕүллүбэт өтүүктээх
Үтүө-мааны көстүүмнээх,
Хаамардыын-сиимэрдиин,
Туттардыын-хаптардыын
Боччумнаах- оттомноох.
Тыла-өһө ылыннарыылаах,
Саҥата-иҥэтэ ыйааһыннаах.
Аныгы айдааннаах үйэ
Араас албастарыгар
Эрбии биитинии
Тэҥҥэ эриһэр
Дьиҥнээх хотун хаан –
Дьыалабыай дьахтар.

2. Коммерсант.

Улуу кытай омугун
Талбыт табаарын
Икки илиитэ
Эрэһиинэлии уунуор диэри
Суумка, таһаҕас бөҕөтүн
Соскойдоһон -сыскайдаһан
Массыынаттан массыынаҕа
Мэнэйдэһэн олорсор.
Дэриэбинэ дьахталларын
Мэйиилэрин сүүйтэлиир.
Биир кэтииттэн
Тэһэ барар,
Биирдэ сууйбуттан
Хайа ыстанар
Уу-чалахайыныы
Кэбирэх таҥаһын
Бэйэҕит билэҕит,
Хайдах табаарын
Атыылаан аҋбардыырын.

3. Хобуоччу.

Атаҕын төбөтүгэр
Үмүрүччү үктэнэн,
Сыбдыҋа сылдьан
Ыалы кэрийэр.
Отон саҕа оччугуйу
Оҕус саҕа оҥорон
Омуннаан кэпсиир,
Куоска саҕа кыраны
Тиигир саҕа тэнитэн
Оннук үһү диэн
Үһүйээн оҥорон
Үлүннэрэн үллэҥнэтэр.
Хобу-сиби хомуйар
Холбоҕор кулгаахтаах,
Кырдьыгы -сымыйаны
Таптаан тарҕатар
Уһуктаах уостаах,
Киһи кулҕааҕын
Хайа көтөн киирэр
Хатыылаах тыллаах,
Кыһыл тылынан
Кынаттанан көтөр.

4. Модница.

Самыытын эрэ сабар
Мини дьууппа дуомнаах,
Бүтэйдии ыйдаҥарар
“Леванте” колготкалаах,
Эротичнаҋдык көстөөрү
Сетка куопталаах,
Тэллэй курдук тэллэйбит
Тэллэҕэр сэлээппэлээх,
Сахсырҕа хараҕыныы
Хара ачыкылаах,
Үчүгэйдик көстөбүн диэн
Үтүөмсүйэ туттубут,
Хара ачыкытын
Аргыый сэгэтэн
Кынат курдук
Уһун кыламанын
Кыһанан-мүһэнэн
Көрөн тэрбэҥнэтэр,
Оҥосто-оҥосто
Хааман кэдэҥнэтэр.
Ис санааҕын, маҋгыгын
Көрүммэккэ-көннөрүммэккэ
Хайдах да тупсубаккын,
Үтүө буолан көстүбэккин,
Кэрэ буолан кэлбэккин.

5. Кик-боксер.

Күлүгээн уолаттартан
Көрүнэргэ, көмүскэнэргэ
Кулгаах тааска тэбэргэ,
Хара быарга да саайарга
Кик-боксер кыргыттар
Дьэ, дьулаан кыргыттар.
Маннык кыыһы
Ойох ыллахха
Мөлтөх киһиэхэ
Олус сэрэхтээх,
Иһэн-аһаан кэллэххэ
Кэтэххэ да тэбиллиэххэ,
Орон да анныгар
Симиллиэххэ, киириэххэ
Аа-дьуо сөптөөх.

6. Күнүүһүт.

Күнү быһа
Сылайа сыһа,
Кытара буһа,
Кыһыҋа-кыйытта
Эрин эрэйдээх
Таҥаһын тэрийэр,
Сиһилии үөрэтэр,
Сирийэн чинчийэр.
Сыттаан ылар,
Уҥа сыһар,
Дьэ, доҕоор!
Булар эбээт,
Биир утаҕы –
Кытархайы,
Будьурхайы
Кыланан иһэн кыатанна,
Хаһыытаан иһэн
Хам барда.
Бэйэтин гиэнэ
Буоларын билэн
Арыый бэттэх кэллэ.
Ол да буоллар
Сөп буолбаат,
Дууһата син-биир Уоскуйбаат.

7. Курортница.

Сыаната ыарахан диэбээт,
Санаатын олох түһэрбээт,
Саас, күһүн буолла да
Сэниэ мунньуна,
Күүс киллэринэ
Сыа уулларына
Соҕуруу дойду диэки
Сапсына турар,
Суола сойор,
Онно оҥойор.
Куртаҕа ыалдьар аатыран
Ключевой уунан
Утахтанар үһү,
Кубарыйдаҕа аатыран
Клюкванан эрэ
Эмсэхтэнэр үһү.
Куурусса курдук
Тоҥсуйан
Киилэ да эбиллибэтэх,
Отой да бэттэх кэлбэтэх.

Улуу убайбыт
Өксөкүлээх Өлөксөй
Өрөбөлүүссүйэ иннинэ
Аҋан хаалларбыт
Сэттэ мэтириэттэрэ
Билиҥҥи да бириэмэҕээ
Күүстэрин сүтэрбэттэр,
Сүдүлэрин мэлиппэттэр.
Икки атахтаах,
Иннинэн сирэйдээх,
Кэннинэн самыылаах
Баарын тухары
Син-биир дьахталлар
Араас мэтириэттэрэ
Баар буола туруохтара.
Аныгы дьахтар сайдыылаах,
Сөбүгэр көхтөөх,
Өһүргэммэтэр сөптөөх.

Н.Федотов.

Нам улууһа,
Бастакы Хомустаах.

Если Вам понравилась данная статья - поделитесь с Вашими друзьями и товарищами в социальных сетях:

Читайте еще: